اشعار ترکی شهریار (شهریارین ترکی گوزل و ادبی شعرلری)

تورکون دیلی تک سئوگیلی ایسته کلی دیل اولماز اؤزگه دیله قاتسان بو اصیل دیل اصیل اولماز اؤز شعرینی فارسا – عربه قاتماسا شاعیر شعری اوخویانلار ، ائشیدنلر کسیل اولماز فارس شاعری چوخ سؤزلرینی بیزدن آپارمیش « صابیر » کیمی بیر سفره لی شاعیر پخیل اولماز تورکون مثلی ، فولکلوری دونیادا تک دیر خان یورقانی ، کند ایچره مثل دیر ، میتیل اولماز آذر قوشونو ، قیصر رومی اسیر ائتمیش کسری سؤزودور بیر بئله تاریخ ناغیل اولماز

اولدوز سایاراق گوزله میشم هر گئجه یاری گج گلمه ده دیر یار یئنه اولموش گئجه یاری گؤزلر آسیلی یوخ نه قارالتی نه ده بیر سس باتمیش قولاغیم گؤرنه دؤشور مکده دی داری  بیر قوش آییغام! سویلیه رک گاهدان اییلده ر گاهدان اونودا یئل دئیه لای-لای هوش آپاری  یاتمیش هامی بیر آللاه اویاقدیر داها بیر من مندن آشاغی کیمسه یوخ اوندان دا یوخاری  قورخوم بودی یار گلمه یه بیردن یاریلا صبح باغریم یاریلار صبحوم آچیلما سنی تاری!  دان اولدوزی ایسته ر چیخا گؤز یالواری چیخما او چیخماسادا اولدوزومون یوخدی چیخاری  گلمز تانیرام بختیمی ایندی آغارار صبح قاش بیله آغاردیقجا داها باش دا آغاری عشقین کی قراریندا وفا اولمیاجاقمیش بیلمم کی طبیعت نیه قویموش بو قراری؟  سانکی خوروزون سون بانی خنجردی سوخولدی سینه مده أورک وارسا کسیب قیردی داماری ریشخندله قیرجاندی سحر سویله دی: دورما جان قورخوسی وار عشقین اوتوزدون بو قماری  اولدوم قره گون آیریلالی او ساری تئلدن بونجا قره گونلردی ایدن رنگیمی ساری گؤز یاشلاری هر یئردن آخارسا منی توشلار دریایه باخار بللی دی چایلارین آخاری  از بس منی یاپراق کیمی هیجرانلا سارالدیب باخسان اوزونه سانکی قیزیل گولدی قیزاری محراب شفقده ئوزومی سجده ده گؤردوم قان ایچره غمیم یوخ اوزوم اولسون سنه ساری  عشقی واریدی شهریارین گللی- چیچکلی افسوس قارا یل اسدی خزان اولدی بهاری

سن وطندن ساری قلبین دویونورسه،مارالیم! وطنین ده مارالیندان ساری قلبی دویونور. وطنی باغریوا باسسان سه وینرسن ینه سن که وطن ده بالاسین باغرینا باسسا سه وینر. منیم عشقیم اوجالیب غوربت اولوب دنیا منه دوست دویانمیر دویونور،دشمن اویانمیر اونور.

آمان اللاه یِئنه شیطان گلیب ایمان آپارا قُورویون قُویمایون ایمانوزی شیطان آپارا منیم ، اینسانلیغمین گُؤرنه حصاری یاوادیر کی گونوز غولِ بیابان گلیر اینسان آپارا خرمنی ساققیزا وِئردیک نه یامان چَرچی دی بو هِی گلیر کَنده بیزه درد وئره درمان آپارا چورَگ آلمیش اَلینه ، آج نئجه طاقت گتیسین اِئله بیریازگئجه سی قیزگلیب،اوغلان آپارا قانلی دیرناخلارینان«انگلیس» اَل قاتدی بیزه باخیسان«روس»دا آرازدان کئچیر ایران آپارا آرادان بیرده بیزی بُؤلسه لر اربابلاریمیز قورخورام  قُویمیالار تبریزی ، تهران  آپارا قارا طوفان کی داخی خلقیله شوخلوق اِئله مز سِئل گرَک اِئل داغیدا،اِئو ییخا،ایوان آپارا بو قارانلیق گئجه لرده قاپوموز پیس دُویولور نه بیلیم ،بلکه اَجَل دیردایانیب جان آپارا آناما سُویله یین اُوغلون ییخیلیب سنگرده تِئللرین باس یاراما ، قُویما منی قان آپارا سَلقه لی اُغرو تاپیلمیشسا بو باشسیز یئرده «شهریار»دان دا گرَک بیر دُولی دیوان آپارا

ایذن وئر توی گئجه‌سی من ده سنه دایه‌گلیم ال قاتاندا سنه مشاطّه تماشایا گلیم. سن بو آیلی گئجه‌ده سئیره چیخان بیر سرو اول. ایذن وئر من‌ده دالینجا سورونوب سایه گلیم. منه ده باخدین او شهلا گؤزوله ، من قارا گون، جورئتیم اولمادی بیر کلمه تمنّایه‌ گلیم. من جهنم‌ده ده باش یاسدیقا قویسام سنیله ، هئچ آییلمام کی دوروب جنّت مأوایا گلیم. ننه قارنیندا سنله ائگیز اولسایدیم اگر. ایسته‌‌مزدیم دوغولوب بیرده بو دونیایا گلیم. سن یاتیب جنتّی رؤیادا گؤرنده گئجه‌لر، من ده جنتّده قوش اوللام ، کی او رؤیایا گلیم. قیتیلیغ‌ ایللر یاغیشی تک قورویوب گؤز یاشیمیز، کوی عشقینده گرک بیرده مصّلایه گلیم. سنده صحرایه ماراللار کیمی بیر چیخ نولوکی منده بیر صئیده چیخانلار کیمی صحرایه گلیم. آللاهیندان سن اگر قورخماییب اولسان ترسا، قورخورام منده دؤنوب دین مسیحایه گلیم. شیخ صنعان کیمی دونقوز اوتاریب ایللرجه، سنی بیر گؤرمک اوچون معبد ترسایه گلیم. یوخ صنم ! آنلامادیم ، آنلامادیم ، حاشا من ، بوراخیب مسجدیمی ، سنله کلیسایه گلیم! گل چیخاق طور تجلاّیه ، سن اول جلوه‌ای طور، من‌ ده موسا کیمی اول طوره تجلاّیه گلیم. شیردیر شهریارین شعری الینده شمشیر، کیم ، دئیر من بئله‌ بیر شیریله دعوایه‌ گلیم ؟

هر چند قوتولماق هله یوخ دارلیغمیزدان اما بیر آزادلیق دوغولوب وار لیغمیزدان (وارلیق)نه بیزیم تکجه آزادلیق قوشوموز دیر بیر مژده ده وئرمیش بیزه همکار لیغمیزدان به به نه شیرین دیللی،بو جنت قوشی،طوطی قندین آلیب الهام له دیندار لیغمیزدان دیل آچامدا کارلیق داگئدر،کورلوغلوموزدا چون لا للیغمیز دوغموش ایدی کار لیغمیزدان دشمن بیزی ال بیر گؤره،تسلیم اولی ناچار تسلیم اولوروق دشمنه ناچارلیغمیزدان هر انقلابین وور- ییخی صون بنالیق ایسته ر دستور گرگ آلماق داها معمار لیغمیزدان هشیار اولاسوز،دشمنی مغلوب ائده جکسیز دشمنلریمیز قورخوری هشیارلیغمیزدان بیرلیک یارادون،سؤز بیر اولاربیز کیشی لرده یوخلوقلاریمیز بیتدیره جک وار لیغمیزدان

برق اولمادی ” قیزیم گئجه یاندیردی لاله نی پروانه نین ” اودم ده باخیر دیم اداسینه گؤردوم طواف کعبه ده یاندیقجا یالواریر سؤیلور : دؤزوم نه قدر بو عشقین جفاسینه ؟ یا بو حجاب شیشه نی قالدیرکی صاورولوم یا سوندوروب بو فتنه نی ” باتما عزاسینه ! باخدیم کی شمع سؤیله دی : ای عشقه مدعی ! عاشق هاچان اولوب یئته اؤز مدعا سینه ؟ بیر یار مه لقادی بیزی بئیله یاندیران صبر ائیله یاندیران دا چاتار اؤز جزاسینه “ اما بو عشقی آتشی عرشیدی ” جاندادیر قوی یاندیریب خودینی یئتیرسین خداسینه

بیر گون آغیز قالار بوش بیر گون دُولی داد اُولار گون وارکی هئچ زاد اولماز گون وارکی هر زاد اولار بختین دورا باخارسان یادیار قوهوم قارداشدی آمما بختین یاتاندا قوهوم قارداش یاد اولار چالیش آدین گلنده رحمت اوخونسون سنه دونیادا سندن قالان آخیردا بیر آد اولار گُوردون ایشین اَگیلدی دورما ،اَکیل،گؤزدَن ایت دوستون گؤره ر داریخار دوشمن گؤره ر شاد اولار

سن یاریمین قاصدی سن ایلن سنه چای دئمیشم خیالینی گوندریب دیر بسکی من آخ ، وای دئمیشم آخ گئجه لَر یاتمامیشام من سنه لای ، لای دئمیشم سن یاتالی ، من گوزومه اولدوزلاری سای دئمیشم هر کس سنه اولدوز دییه اوزوم سنه آی دئمیشم سننن سورا ، حیاته من شیرین دئسه ، زای دئمیشم هر گوزلدن بیر گول آلیب سن گوزه له پای دئمیشم سنین گون تک باتماغیوی آی باتانا تای دئمیشم ایندی یایا قیش دئییرم سابق قیشا ، یای دئمیشم گاه توییوی یاده سالیب من دلی ، نای نای دئمیشم سونرا گئنه یاسه باتیب آغلاری های های دئمیشم اتک دولی دریا کیمی گؤز یاشیما، چای دئمیشم عمره سورن من قره گون آخ دئمیشم ، وای دئمیشم

ایتیمیز قورد اولالی، بیزده قاییتدیق قویون اولدوق ایت ایله قول- بویون اولدوق ایت الیندن قاییدیب، قوردادا بیرزاد بویون اولدوق ایت ایله قول- بویون اولدوق قوردوموز دیشلرینی هی قارا داشلاردا ایتیلتدی قویونون دا ایشی بیتدی سون، سوخولدی سورویه، بیر سورونی سؤکدی- داغیتدی اکیلیب، ایت گئدیب ایتدی بیزده باخدیق ایت ایله قورد آراسیندا اویون اولدوق ایت ایله قول- بویون اولدوق

ایسلام اویاتدی خالق باشین قاوزایان قاچیر شیطان باجارمادی کی , یاتانلار اویانماسین هر رنگی آت , فقط بویان الله بویاغینا هر آلدادان بویاقلارا قلبین بویانماسین خالقین گؤزون اویاردی شاهین میر غضبلری قوی بیر اویولسون اوز گؤزو تا گؤز اویانماسین تبلیغ او پایده گرک اولسون کی موددی بیر نقطه سینده ضعفینه بارماق قویانماسین الفاظی مؤحکم ائتملی معنانی چوخ لطیف سؤزلر گرک سوغاندیسا , هر کس سویانماسین اما گئجه نمازدا قیلیرسان یاواشجا قیل قوی زحمت ایله هوشلانان اولسا، اویانماسین آغزیندا دادلی سؤزلریوی سن ده (شهریار) ائیله پیشیر کی , خالق دادیندان دویانماسین

بیر اوشاقلیقدا خوش اولدوم اودا یئر گؤی قاچاراق قوش کیمی داغلار اوچوب ، یئل کیمی باغلار گئچدی صونرا بیردن قاطار آلتیندا قالیب ، اوستومدن دئیه بیلمم نه قدر سئل کیمی داغلار گئچدی اوره گیمدن خبر آلسان : « نئجه گئچدی عؤمرون ؟ » گؤز یاشیملا یازاجاق «من گونوم آغلار گئچدی»

خان ننه ، هایاندا قالدین بئله باشیوا دولانیم نئجه من سنی ایتیردیم ! دا سنین تایین تاپیلماز سن اؤلن گون ، عمه گلدی منی گه تدی آیری کنده من اوشاق ، نه آنلایایدیم ؟ باشیمی قاتیب اوشاقلار نئچه گون من اوردا قالدیم قاییدیب گلنده ، باخدیم یئریوی ییغیشدیریبلار نه اؤزون ، و نه یئرین وار « هانی خان ننه م ؟ » سوروشدوم دئدیلر کی : خان ننه نی آپاریبلا کربلایه کی شفاسین اوردان آلسین سفری اوزون سفردیر بیرایکی ایل چکر گلینجه نئجه آغلارام یانیخلی نئچه گون ائله چیغیردیم کی سه سیم ، سینم توتولدو او ، من اولماسام یانیندا اؤزی هئچ یئره گئده نمه ز بو سفر نولوبدو ، من سیز اؤزو تک قویوب گئدیبدیر ؟ هامیدان آجیق ائده ر کن هامییا آجیقلی باخدیم سونرا باشلادیم کی : منده گئدیره م اونون دالینجا دئدیلر : سنین کی تئزدیر امامین مزاری اوسته اوشاغی آپارماق اولماز سن اوخی ، قرآنی تئز چیخ سن اونی چیخینجا بلکی